Projekt Consilium Communis Transkription und Erschließung Fabian Peters Patrick Sahle Reinhold Mohr Klaus Wyrich Martina Schöler Stadtarchiv Neuss

Oberstraße 15 41460 Neuss Deutschland

2026 Band 02 02

Protocollum de Anno 1530. Usque ad Annum 1563 inclusive.

Dyt ys dat raydtz boych durch eyn Eirsam Raidt der werdiger Staidt Nuysse gehandelt ind gesloissen

Anno XV C XXX O Werner vame Leehene Johannes Eibeltz burgermeistere

Des secretarius eydt

Item up frydach na Sent Fransciscus des hylligen confessoir in Sent Remeys maendt byn ich Henrich Broder notarius ind schryver der geystlicher iurisdiction bynnen der Stadt Nuysse durch eyn Eirsam Raidt der wirdiger Staidt Nuysse zo eynem secretario ind schryver der vurschreven Staidt Nuysse gekoeren ind angenommen darna des neisten fridach up Sente Calixtus dach des hylligen payss have ich Henrich vurschreven dem Eirsamen Raidt obgemelt in yre raydtzkaemer mynen eydt gedain ind hain vur geloifft ind na zo den hylligen myt uffgerichtden vyngeren gesworen / truwe ind holt zo syn / mynen dyentz truwelich ind vroenlich as eynem eirberen diener zobehoirt zo verwaeren ind so wes ich in dem rayde ader sust anders van heymlicheit ind privilegien der Stadt Nuysse off anders hoeren ader vernymmen neit zo melden noch eynniche copien van privilegien off anders uffzocopieren ind die niemantz zo geven buyssen sunderlich bevell myner heren ouch off eynnich zweydracht tusschen dem rayde qweme off unstunde dat allzyt zome besten helffen zo sprechen ind ouch geynen orloff zo rysen nymmen dan der raydt myr allzyt orloff zo geven

Henrich Huypertz

Item up godestach na Martini des hylligen Busschoffs zo vier uren na mytdage hait Henrich Hupertz van Butgen syn gewonlige oirfeyd gedain vur geloifft ind na lyffhaftich zo gode ind den hylligen gesworen den scholten ind burgermeistere der stadt Nuysse / dat gefencknys yeme geschiet gegen unserem guten (?) herrn (?) van Coelen noch burgermeistere scholten noch scheffen raidt ind gemeynde der stadt Nuysse neit zo frechgen etc

Gobell Mertens

Item up frydach na Cuniberti des hylligen Busschoff is durch eyn eirsam raidt eyndrechtlich verdragen ind gesloyssen dat Goebel Mertens der gewalt halven / die hie her Lenhart vame Broick pastor zo Ihleen in synem huyss do in der Brughstrayssen wonende / gedain hait / buysen der stadt Nuysse sall blyven as ouch yrst durch eyn eirsam raidt verdragen ind gesloissen wais

Gerhart Hammecher

Item ouch up denselven frydach ys durch eyn eirsam raidt verdragen ind ge- sloyssen dat Gerhart Hammecher umb etzliche deyffrye geschiet / buyssen der staidt Nuysse blyven sall

Item up den selven frydach hait Johannes vame Bergh ind Philips Berchs eynen Eirsamen Raidt die snytzyss van dem wullendoich up gesaicht und eyn Ersam Raidt sulde sich darup bedencken / want sy die zyse neit langer haven wyllen

Item up den selven dach hait eyn eirsam raidt die roeßgens ind huntges pennynck up eynen haller gesatzt und die halve haller as moenstersse cleyffsche ind roemunsche sullen neit gelden

Her Peter Ysrahell myt der myssen in der kloicht

Item up den selven dach hait eyn Eirsam Raidt / heren Peter Yserman van Nuysse / Johannes up der Waegen soen / der vur mynen heren up der raydtz stoeven qwaym ind umb gotz willen myt synem vader Johannes gebeden haint / die vier myssen in yecklicher wechen under in der kloicht in Sent Quirins moenster bynnen Nuysse durch yeme zo lesen ind bedienen / ange nommen / ind die eyn zyt lanck zo bedienen ind lesen so lange eyn Eirsam Raidt beliefft ind guet dunckt syn / in aller mayssen as selige her Herman Knoup in zyt syns levens die selve vier myssen bedient ind gelesen hait etc

Johan Wynckes

Item up frydach na Sent Andreis des hylligen apostels ys durch eyn Eirsam Raidt verdragen ind gesloyssen dat Johan Wynckes umb des doytzslachs halven myt selige Wilhelm Leven up Unser Liever Vrauwen dach Annunciatione in der vaesten neist verleden by der Moeren Gaeten an der Tollportzen geschiet buyssen der Staidt Nuysse sall blyven

Gerhardus zom Dulcken

Item up fridach na Epiphanie Domini ys durch eyn Eirsame Raidt eyn- drechtlich verdragen dat Gerhardus zome Dulcken sulche kummer as hie lestmaill up Gertgen Bruwers burgersse zo Nuysse / guedere myt dem gericht zo Lynne gedain hait / sall laissen rysen ind affstellen / ind deit hie des neit so sall hie up die portz gain etc

Heinrich Riepgen

Item up dinxtach na Sent Agneten ys durch eyn Eirsam Raidt eyn- drechtlich verdragen dat Henrich Reipgen / sulche appelation / die hie van eynen ordell / durch myn heren scheffen des hogengerichtz der Stadt Nusse / dat Henrich dat pryvait / durch syn huyss ader dat ander huyss yeme ouch zogehoerich / reynnygen sall / thussen yeme ind Ailheit Schomechers / gegen dem gaisthuyss in der overstraissen gelegen / gewyst gedain hait / sall laissen rysen / ind dat privat reyn laissen machen thussen dat ind en saterstach zo komende / ind deit hie des neit / dan mach Henrich dan syn wert annymmen

Raitzpersonen zo der stat portzen zo verwaren verordent

Item up frydach na Sent Appolonien der hylliger iunfferen as die besichttunge der pelongi halven des donrestach na Sent Valentyn neisst komende / durch scrifften unsers gnedichsten heren van Collen thussen eym Eirsam Raydt ind gemeynder der Stadt Nuyss eyns ind den iunckheren Wilhelm van Nuwenair ind Johan van Ryfferscheit anderdeils in den borban zo Nuysse / geschietz syn sold / synt dusse nafolgene raitzpersonen zo der stadtportzen van Nuysse verordent die zo verwaren

Up der Overportzen Diederich Knayd Johan Oysthoven Up der Tollportzen Herman Reipgen Johan Ebeltz Up der Hantportzen Johan Garthoff Rembolt Kreytfysch Up der Nederportzen Johannes Wettzell Johan Smackert Up der Rynportzen Werner Apteicker Henrich Gotschalck

Iuramentum Camerarii

Item up maendach Sent Valentins avent ys Henricus Symons Burgere zo Nuyss durch eyn Eirsam Raidt vur eynen kamerknecht baed ind doerwechter ind ouch eynen roeder angenommen eyn iair ind hait vur gesichert ind geloifft myt upgerichten vyngeren lyfflich zo gode ind den hylligen gesworen dat hie der stadt Nuysse ind synem heren altzyt gehoirsam truw ind holt syn sall ind wes dat hie vur off na van scheffene ind rait up dem raithuyse hoeren wyrt heymlich zo halden ind des nemans zo offenen ind sich ind synen geboden hie doinde wirt ind vort in allen dyngen sich eirbarlich fromlich ind up- rechtich zo halden ind nemant geyn geschenck zo doyn / dan myt bevele syner heren und in sunderheit sich neit droncken zu dryncken und hie sall zo loene haven X gulden current ind eynen gulden current vur eyn kogell sunder cleydong und vort syn offergelt ind ander verdienst as man des gewonlich yst

deß klockn leuthen lutitz (?)

Item up saterstach na Cathedra Petri ys durch eyn Eirsam Raidt der Staidt Nuysse eyndrechtlich verdragen ind gesloyssen vaste ind stede zo allen zyden sunder avelayssen zo halden ind beyden burge mysteren zor zyt der Stadt Nuysse wesende ernstlich geboden

Wem man die storm klock luden sall Iura wegen den klocken

dat man der abdissen iunfferen und canonichen des moensters Sent Quirins burgemysteren scheffene ind raidt der Staidt Nuysse in zyden as sy gestorven synt ind ouch als yre begenckenysse gehalden wyrt myt der groisser kloicker ind ander kloicken / as dat van alders gewonlich ys beluden / und nemantz anders van burgere burgersse inwoeners ader ander frempder lude / ussgenommen burgemysteren scheffene ind raytzvrauwen / beyde kyrchmysteren / secretarium / doer- wechter ind bouwmyster der Stadt Nuysse vurschreven / den man ouch die groysse kloick myt anderen kloicken / wie dat ouch van alders gewonlich ys / in zyden yrs begenckenysse / und neit in zyden as sy gestorven synt / luden sall und des sall man dem custer der kyrspoelkyrchen Sent Quirins moenster vurschreven vur synen loen die groysse kloyck zu luden wie vurschreven steit geven seess albus ind van anderen burgeren burgersse in- woners off ander frempde luden / vur syne loene geven alb III albus / allet als in zyt der betzalonge bynnen Nuysse genge ind geve synt ind wyders neit

Henrich Riepgen myt dem pryvait

Item up dinxtach na dem sonnendach Reminiscere ys nochmails durch eyn Eirsam Raidt verdragen ind geslossen ind Henrico Symonis dem doyrwechter in der raytzkammer geboden ind bevolen / dat hie Henrich Reipgen van wegen eyns Er samens Raitz gebeden sall dat hie dat d privait ader heymlichen in des hammecherhuyss genant stainde gegen dem gaysthuyss thussen dit ind morgen zo komende sall bestayn reyn zo maichen / und deit hie des neit so sall hie des anderen dages darna myt der sonnen up die portze gayn

Wilhelm Schomecher under baede eydt Iuramentum der stadt diener

Item up fridach na dem sonnendach Letare ys Wilhelm Schomecher van Maichgeschien burger zo Nuysse vur eynen underste baede der Stadt Nuyss in stat selige Peter Gobels angenommen ind hait vur gesichert ind na geloifft ind myt upgerichten vyngeren lyfflich zo gode ind den hylgen gesworen /der Staidt Nuyss getruwe ind holt zo syn gehoirsam ind willich ind eynem yederem man in synem boitschafften uprechtich ind geluefflich zo syn ind syn saichen ind boitschafften die yeme befoelen werden in gueder hoeden bedeckt by sich zo halden und sall sich vur droncken dryncken ind vur spielen hueden ind myt nemantz geyn getzenck off kyff zo machen und sall alle raytzdage up syn heren ind des hylligen daigs up syn burgemysteren waichten und off men eynnige overtreder ind myssdediger anfangen ader gryffen suld asdan getruwelich hende myt anslayn und nemantz vur gefenckenysse zo wairschauwen

Dysse hernageschreven synt ime iaire vurschreven durch die vurgenante burgemysteren burgere geworden der Stadt Nuyss

N3

Merten van Collen tymmerman ind hait syn ampt myt untfangen Johan van Goyr schroder ind hait dat schroder ampt myt untfangen Henrich Oemkens ind hait dat kairbender ampt myt untfangen Henrich Stockmans van Nuyss ind hait dat schomecher ampt myt untfangen Jacob / Hermans Beckers kranmysters son Henrich Holtbutgen van Nuyss Johan Kryns van Nuyss Rembolt Hellenbroich ys nochmails vur eynen burger untfangen Johann Schroder van Vysschell Peter Bonenkamp van Spelder Gotschalck Gruntzgen van Nuyss ind hait dat schomecher ampt untfangen Clays Bayck van Heerd Thys Starck van Vysschell Clays Fynck van Lanck Johan Bernnensborch van Aichen Reynart Leen van Schechtelen

Frederich van Lymborch bartscherrer Peter Muyrer van Undorp Thomas Seylspenner van Nuyss Jacob Knyll van Nuyss smyt Tilman ime Underbroick van Nuyss Johan ime Underbroich van Nuyss gebrodere Andreis Peltzer van Crefelt Herman Geyrlichs van Oysterraidt Henrich van Fleysshem Johan van Odenkyrchen Johan Rutgers van Zoynss Steffens Henrichs Nelys Wefer van Urdingen Conraidt Schroder van Norfft Johan Wefer van Heymbach Johan Nagellsmyt van Duyren ind hait syn ampt myt untfangen Johan Wefer van Wylich Goert Segensnyder van Lanck Engell Haesert van Nuyss Johan Haesert van Nuyss syn broder

Ann o 1531 Anno etc XVc XXXIo Werner Strythoven Johann Smackert burgemystere

Die soyp gegeven

Item up donrestach na dem sonnendach Letare synt Werner Strythoven scheffene ind Johan Smackert raytzman durch eyn Eirsamen Raidt ind die frunde der XXIIII yrst gekoren ind des saterstach darna up Unsere Lieven Vrauwen Annunciationis haven die selve burgemystere vurschreven yre gewon lige eyde gedayn ind yre soyp gegeven / umb dat die rentmysteren der Staidt Nuyss yre rechenschaff alsus lange vertzogen hadden

Engell Schroder Nota

Item up fridach na Inventionis Sancte Crucis hait eyn Eirsam Raidt Engell Schroder burgere zo Nuysse vur eynen umspreicher in dem hoegericht zo Nuysse angenommen ind hait ouch die cleydonck gegont ind erleufft

Peter Loer wechter

Item up den selven frydach hait eyn Eirsam Raidt Peter Loer Burgere zo Nuysse vur eynen wechter up den Torn van Sent Quirins Moenster angenommen ind yn damyt begaifft

Die koee neit gewynteret

Item up dinxstach na dem sonnendach Cantate ys durch eyn Eirsam Raidt eyndrechtlich verdragen / dat man geyn koee up dem haem noch ouch up der wayt sall dryven noch layssen weyden / die neit hie zu Nuysse gewynttert synt ind dat gelt dat man van sulche ungewyntter kooen untfangen hait dat sall man den luden widder geven ind suche koee sall man widder umb van dem haem ind wayt affdryven

Iunffer Fultzgen

Item up saterstach na Petri ad Vincula ys durch eyn Eirsam Raidt eyndrechtlich verdragen dat beyde burgemisteren mit dem secretario vur dem torn by iunffer Anna iunffer Fultzgen van Nuwenkirchen dinst iunffer gain sulden ind van yr fragen / off sy by den worden blyven wuld die sy gesteren des fridachs neist verleden in dem torn vur die eirwerdige heren Johan Bruwer dechen ind Henrich Wetzell canonichen Sent Qui rins der Stadt Nuysse myster Henrich Syttart doctor in der medicinen iunckher Adolff van Hetzongen iunffer Fultzgen huysswirt Henricus Broder secretarius ind Wilhelm Kannengeter burgere zo Nuysse / gesproichen hait / wie sy durch die dieners gesleifft ind in den Torn gestoissen weir dat sy neit verdient hed ind yr verdrusse / want sy gegen die Stadt Nuysse neit gedain hait ind en weir van geynen steyne gesprongen ind wulde des gedencken ind yre frunden dat clagen / dat eynem Eirsam Raide gantz befrempden angesien sy neit gegriffen noch gefangen noch gesleifft off geleidt noch ouch durch geynen diener gefencklich gesatzt weir dan sy selffs ungetwongen / moit willich usser yren eygen gemuede van dem Broickhoff bys an den torn myt yrer iunffer fultzgen gegangen weir ind ouch up die zyt durch beyde burgemeister zo yr gesprochen weir / wulde sy by yrer iunffer blyven in dem torn ind doyn yr ge seltzschaff dat sy neit alleyn en weir / dat muchte sy doyn / off wulde sy heym gayn ind neit da blyven dat muchte sy ouch doyn sy geven yr den willen daran / ind so weir sy in den torn gegangen by yrer iunfferen moitwillich ind gesprochen sy wulde by yr blyven ind doyn yr geselschaff up dat sy neit alleyn en weir und were saiche dat sy by den worden bleve / moiste sich as dan eyn Eirsam Raidt darup bedencken do haven beide burgemeisteren na middage zo dryn uren darumb trynt iunffer Annen sulchs vurschreven vur dem torn vurgehalden ind sy bywesen der vier diener / die darby gewest waren / gefraigt ind mit gesprochen / were yemantz van den dieners der yr sulchs gedayn hedde / dat sy sunder voirsagen ind neit verswygen wuld / den wulden sy darumb straiffen so dat eyn ander darvan yn exempell nymmen suld as do hait dieselve iunffer Anna under ander worden geantwort sy weir neit gegriffen gefangen gesleyfft noch geleidt noch ouch gefencklich gesatzt / dan willich mit gueden wyll mit yrer iunffer vurschreven van dem Broickhoff bys vur den torn gegangen ind zome lesten as sy by yrer iunfferen blyven wold up dat sy neit alleyn weir / dan geselschaff hed / ind by yrer

iunffer in den torn gayn wold ind vur der doeren des torns stunde / ind yr iunffer sich by yr neit haven dan alleyn syn wold sy zorugge stoissende / hedde eyner der selver diener / den sy neit en kente noch ouch neit en weys wer hie sy / do in den torn vort gestoissen / off sulchs mit upsatzt off unverhoetz off in wat maneren geschiet were / ys yr neit kundich / dan demghenen sulchs gedayn umb gotz willen vertzyet Ouch hedde sy de andere worden gesprochen / dat yr leidt weir / ind dat neit bedacht hed dat sy darinnen mynen heren zo nae gesprochen ind damyt mysdayn het ind bat darumb mynen heren sulchs zo vergeven / ind dat yren frunden neit clagen off vurhalden wuld / so yr neit mysdain ys / dat darvan der stadt eynich last off verdreys anekomen suld ind dat zo halden vast ind stede hait sy sulchs beide burgemeisteren in yre henden geloifft ind ouch mit gesprochen dat yr allezyt durch beide burgemisteren ind ouch yrer diener gesacht were dat sy neit gefencklich werre gesatzt ind wanneir dat yr beleiffden ind wuld so sulde man sy uisslayssen ind gayn ind stayn wan sy willet

Item up saterstach na Sent Laurentius hait iunffer Anna iunffer Fultzgen van Nuwenkyrchen dynstziunffer mit iunffer Fultzgen vurschreven uisser dem torn boven die Schuttebaene uissgegangen ind hait aldair van dem scholtiss in bywesen beider burgemeister alle puncten wie vurschreven vur beide burgemeister geluydt bekant ind ouch hanthaftong dem scholtiss gedain wie sy ouch vur beiden burgemeisteren geloifft hait

Ein burger gegen den andern Neit zo sprechen myt uisswendigen rechten

Item up dinxstach na Egidii des heyligen abtzs ys durch eynen Ersam Raidt der Stadt Nuysse eyndrechtlich verdragen dat geyn burger der Stadt Nuysse den anderen synen mitburger buysser der Stadt Nuysse myt eynich uisswendigen rechten anspreichich sall machen off belestigen etc

Henrich Keyser leproyss

Item up fridach na Franscisci ys durch eyn Eirsam Raidt eyndrechtlich verdragen dat Henrich Keyser leprois neit langer up den seichenhoff by Nuysse ind in dem boirbann van Nuysse gelegen neit longer syne wononge ader verblyff haven / dan sich usser dem borban machen sall / angesien hie eynen Ersamen Raidt der Stadt Nuysse ungehoirsam gewest ys ind yre verbot versmait ind veracht hait so dat yeme zweir off dry maill verboden ys dat hie bynnen Nuysse neit benachten noch ouch den gelichs syn sold ind nu eyn zyt lanck van dagen ind nachten in synem huyss in der Nederstraissen gelegen dar gesloiffen gessen ind gedroncken hait / as ouch myt Diederich Kattzen leproys in der Brughstraissen verdragen ys an dynstach neist verleden sich ouch uiss Nuysse ind van dem seichen haven zo machen ind neit langer zo blyven

Johan vame Steyn

Item up den selven frydach hait eyn Ersam Raidt Johan vame Steyn burger zo Nuysse zogelaissen dat hie alle dage die middage mailtzyt haven sall ime gaysthuy(s)

Peter Wilges zo Coelen

Item up maendach na Franscisci synt Werner Strythoven ind Johan Smacker(t) beide burgemeistere zorzyt by Peter Willges burgere zo Colne in den torn gegangen ind yeme syn thesse gedain dar he selffs uissgenomen hait eyn hantscrifft antreffende Johan van Geller burger zo Weesell ind eyn missive durch den gnanten Johan an dem scholtis van Berck geschreven die selve hantscrifft berorende die hie den burgemeisteren gedain hait ind sy vort van stunt an die selve brieve Hylgen burgersse zo Colne vur dem torn stainde Peters huysfrauw gelievert haven des Peter waill zofreden wais

Harttich Vysschell

Item up donrestach na Aller Liever Heilgen Dach zo zien uren vur myddage in burgemeisters huyss Werner Strythoven / in bywesen Werners vurschreven ind Johan Smaickert beide burgemeisteren der Stadt Nuysse / synt dusse punten Harttich Vysschell dem dat kraenschriverampt / dat Jacob Knoid had / ge geven ys myt dem roederampt / die herna geschreven staint ind durch eyn Ersam Raidt verdragen vurgelesen

Kraen schryver

Item sall der kraenschryver alle saterstach na myddage up die rentkammer scrifftlich brengen wes hie van burger off van frempden wynen ame kraenen upgeschreven hait / want men dat asdan in der stadtboich vortsetzen ind schriven sall ind dat by synen eydt up verluyss syntz amptz neit zolaissen

Item men sall ouch dem kraenmyster befelen dat hie geyn gelt vam dem kraen up die rentkammer enbreng / hie en have den kraenschryver ind der roeder eyn by sich / want man anders dat gelt neit van yn untfangen sall ind dys ouch up verluyss syns amptz neit zozolayssen

Kraen myster

Item der kraenmyster sall ouch geynre kunne wyne kraenen / der kraenschriver sy darby allet up verluyss syns amptz up dat die wyne uprechtich upge schreven werden want man dair gebrech in gefonden hait

Roder

Item sall men ouch den roederen befelen so wess sy ame kraenen roeden sullen sy upschriven ind dat vort scrifftlich up gemelte zyt up die rentkammer brengen die men ouch in der stadt wynboich schreven sall

Roder

Item ouch sullen die roeder alle uissverkueffte wyne upschriven ind die schriffte ouch alle saterstach up die rentkammer brengen / die men dan ouch in der stadt wynboich schriven sall / des sullen die rentmysteren dat gelt van den uissverkoichte wyne alle wechen van den luden des wynes doyn hoelen ind uissmanen ind dat uiss sunderlicher oirsachen etc up dat nemantz darmyt bedacht wirt

Kranenschreiber

Item sall ouch der kraenschryver up schriven mennigen dach ind halven dach die kraenknecht wynden / dar d hie ouch die rechenschaff vanbrengen sall up dat die stadt off nemantz verkurtz en werd

Kranenschreiber

Item der kraenschryver sall buyssen wyssen des kraenmysters syne wyne up schriven ind neit uisser dem boich des kraenmysters und der kraenmyster sall ouch buyssen wyssen des kraenschryvers syne kraenzeichen upschryven ind neit uisser des kraenschryvers boich / dan eyn yder besunder voir sich alleyn

Item up dese vurschreven puncten sullen die rentmysteren eyn scharp zo versicht haven und were der vurschreven dienre eynich dar innen versuynlich dat sullen die rentmysteren dem raidt zor kennen geven / die overtreder dar umb zo strayffen

Roeder eydt

Item hait Harttoch Vysschell als eyn roeder angenommen / vur geloifft und na gesworen dat hie ydermanne na synem besten synnen ind verstande dem armen as dem rycke ind dem rycke as dem armen ind den bur- geren as dem frempder ind dem frempder as dem burgeren uprechtich roeden sall eym yederem dat syn zo geven

Kranenschriver eydt

Item hait Harttoch Vysschell ouch als eyn kraen schryver angenommen / vur geloifft ind na gesworen zo den heiligen / dat hie alle wyn ame kranen uprech tich upschriven sall dem armen as dem rychen ind dem burgeren as dem frempder up dat die stadt noch nemantz dardurch bedrogen off dat niemantz dat syn untfrempt en sall werd ind dusse vurschreven puncten synt yeme ouch vurgelesen die hie ouch by synem eyd geloifft hait zo halden vestlich

Anno domini duysentvunffhundertzweyinddryssisch up fridach na nuwe jairs dach yst durch eyn Ersam Raidt eyndrechtlich verdragen dat man Gertrud myt den honden eyner alder vrauwen wonende gegen dem Claren bruyhuyss alle wechen van wegen des gaysthuyss der Stadt Nuyss dry wyspennong yre leven lanck hantreichen ind betzalen sall

Gerhart van Urdingen dat gaysthuyss gegeven

Item up dem selven fridach yst ouch durch eyn Ersam Raidt verdragen ind dem groyssen Gerhart van Urdingen die provent in dem gasthuys der Stadt Nuyss gegeven die zo gebruchen as andere provender ind des sall derselve Gerhart die weghe der strayssen in dem velde machen dat man myt wagen ind karen varen mach ind andere arbeit In dem gaysthuyss van noeden doin, so lange hie dat doin kan / als hie mynen heren zogesacht ind geloifft hait und dem scholepper der vur eyn provener angenommen ways syn proevent upsagen ind mynnen in behoiffs Gerhartz angesien dat gaysthuys noch geynen haller na syner zosagen untfangen hait

Den Loehoff zo bouwen

Item op fridach na der Heiliger Dry Kenynck Dach ys durch eyn Ersam Raidt eyndrechtlich verdragen ingegangen ind erleufft dat Conraidt Loer burger zo Nuyss den Loehoff up den orde van der Gebranden Gaysse gegen der stadt muyre leggende / up dat alde funda ment ind foyss / as hie nu steit / eynen nuwen bouw doyn sall / ind wyder neit uysfaren / dan idt ytzont steit ind sall den Duysynck kynderen yre gelt / van dem Loehoiff lude yrs kouffs gedain / betzalen

Rembolt Kreitfysch Rembolt Moenhem

Item up dinxstach na Anthonii abbatis hait eyn Ersam Raidt eynen uss- sproich gedain thussen dem Rembolt Kreitfysch rentmyster ind Rembolt Moenhem zome Crantz so die beide parthye vurschreven / die saiche an eyn Ersam Rait ge- satzt ind gestalt haven / wes eyn Ersam Raidt thussen yn sprechende wurd / dar by wulden sy blyven ind dat also stede ind vast halden / nemlich dat Rembolt Moenhem sall van stunt an dat sloys dat hie gegen Rembolt Kreitfysch willen an die portz up der Nederstraissen / beneven yrer beiden parthyen ervenstande / gehangen / hait / ind Kreitfysch darmyt synen in ind ussganck der portzen benomen / affdain ind Kreit fysch synen schaden dardurch geleden uprichten ind betzalen ind darmyt sullen beide parthyen der saichen halven zofreden syn ind geyne zweidraicht darumb haven ind die gewalt die Moenhem Kreitfysch darmyt gedayn hait / hait yem eyn Ersam Rait up dusse zyt vertzegen angesien / dat Moenhem / Kreitfysch brieve ind instrumen den overgemaicht gesien ind gewoist hed Kreitfysch gerechticheit / die eyn Ersam Raidt gesen ind gehoirt hait / sulde Moenhem sulche sloys vur die portze neit haven gehangen

Iuramentum XXIIII ren electione novi pro consulis

Item up fridach na conversionis Pauli hait eyn Ersam Raidt up der raytz stoven dem sementlichen frunden der XXIIII so sy nuwe raitzpersonen keysen wolden / dat punct ind clausell des privilegien durch mylder gedechtenysse leven heren Diederichs ertzbusschoff der heiliger kyrchen zo Coelne etc gegeven inhaldende den eydt wie die frunde der XXIIII nuwe raitzpersonen keisen sullen vurlaissen lesen / alsus ludende und wanne dat ymantz van den gekoren raitzluden afflivich ader undogentlich wurden so moigen die XXIIII burger van der gemeynden / die sulchen raytzman kiesen werden sullen zo allen zyden vur unsen scheffen raide ind gemeynden aldair myt upge reckten vyngeren gestaefftz eydtz lyfflichen zo gode ind den heiligen sweren nymantz anders umb leve noch leidt umb golt sylver off andere gave dan zo kiesen / dan denghienen / den sy na yrem besten synnen ind verstent tenysse meynen uns ind unsen nakomen ind gestichte ind unser stadt vurschreven dar zo nutz ind bequeme zo syn sulchs yn vurgelesen hait eyn Ersam Raidt yn vurgehalden wie in eynem jaire etzliche geschickden raitz frunde der Stadt Nuysse by unserem gnedigen heren van Coelen umb saichen willen zo Zoyns waren ind zome lesten weren etzliche reede unseres gnedigen heren by sy gekomen ind yn vurgehalden / dat eyn Ersam Raidt den frunden van den XXIIII wairschauwen wulden / dat sy nu vortan / als sy nuwe raitz personen kiesen wulden / inhaltz des eydtz nagingen ind dat also heilten ind geyne raitzpersoen mere kiesen wulden / dan die darzo bequeym weren ind ouch schriven ind lesen kunten / deden sy dar unt gegen / wurde unser gnediger heren geoirsaicht dieselve neit zo confirmeren

der van dem yrdom confusie ind andere gebrechen kommen mochten und dat die frunde van den XXIIII yre beraidt nemen ind sulxs waill betraichten as do synt die frunde van den XXIIII van der raitzstoven up der raytzcamer gewychen ind yre beraidt under sich genommen und do widderumb up die raitz stove vur eyn Ersam Raidt gekomen ind eyn yder besunder van den XXIIII haint beyden burgemysteren hanttastong gedain ind do lyffhafftich zo gode ind den heilgen gestaifftz eydtz myt up- gereckden vyngeren gesworen / dit vurschreven also zo halden ind zo doyn und damyt synt die frunde der XXIIII wider van der raitz stoven in die raitz camer gewychen ind aldair vunff nuwe raitz personen gekoren ind do wydder in die raitz stove gekomen ind aldair die vunff nuwe raitz per- sonen offentlichen gelesen als myt namen na eyn anderen her na geschreven noian (?) nauwen (?) proconsulen Arnoldus Bueckan Peter Apteycker Rembolt Monhem zome Crantz Ewalt Riepgen Peter Bruwer

Dysse herna geschreven synt ime jaire XXXI vurschreven durch die burgemeister obgenannte burgere der Stadt Nuysse geworden

Werner up Boyschhoff van Butgen Merten Pyschynck van Volmerswerd Henrich Leiffckens van Hulss Conraidt Spengeler van Ratingen hait myt dat kremerampt gewonnen Reynart Bruwer uiss dem Haem Diederich Potgeters van Nuyss hait myt dat bartscherreramt gewonnen Johan Duyssberch van Nuyss schomecher Rutger Harttich van Burich beckerknecht Diederich Brentges van Dusseldorp becker Johan Hammecher van Nuyss Merten Sloyssmecher van Gladbaich Diederich van der Baich Wilhelm Hyntzen myt dem schomecherampt Johan Duymgen van Nuyss Johan Knoup der Jong van Nuyss Herman Bodenkloip van Lanckquaden raidmecher Diederich zome Schoip Herman Vysschell Peter son van Raidt Johan Thonys Munnichs son Werner Vetten

Peter Gruntzgen Angneis {?} Gruntzgens son Peter Gruntzgen Styngens Fuyst son Johan Pyper uiss Genhien {?} beckerknecht Johan van Braicht Jacob Schomecher van Nuyss Jacob Mertens van Nuwenkyrchen beckerknecht Thonys Cavytz beckerknecht Curstgen van Lorych fueller Gerhart van Lorych bruwer Jacob van Nuyss bruwer Peter Kattzen van Nuyss Meus Fladenbecker van Maystricht Johan Doyrre van Kewych Henrich Buyssgen Spylman Conraidt Sanders van Greiffrath {sehr mutige Auflösung, aber nicht unplausibel} Jacob Huyckels Henrich van Hulss Theys van Wylich Rembolt Pyltz Jacob Glayssmecher Johan van Bruell Johan van Gladbaich Peter van Oysteraidt

Anno XV C XXXII Johan Moenhem zome Crantzen en Conraidt Kyver Burgemeisteren

Tringen Kattzen die Stadt zu ruymen

Item up frydach na dem heiligen hoegetzyt paysschen yst durch eyn Eirsam Raidt eyndrechtlich verdragen ind beiden burgemeisteren ernstlich befolen ind geboden / dat sy Tringen Kattzen elige huysfrauwe Diederichs Guylicher in der Brughstraissen wonende / willen besenden ind yr ernstlich gebeden / dat sy umb yre overspyll sy myt heren Godert Schryver van Stralen presteir zo doyn hait ind in den heiligen sent myt yem gefroicht ist / die Stadt Nuyss ruyme ind dar buyssen blyve / bynnen echt dagen neist zu komende und geschege sulxs neit van yr thussen der zyt / dat sy dan yr wert daran nym so sall man sy dan die kerttzen laissen dragen ind slayn sy an den kaixs ind dryven sy dan uiss der stadt zo eynem exempell etc.

Den wyn neit heymlich zo zappen dan myt krentzen etc 1/3 brugten pro consulibus

Item up dem sonnendach gnant Cantate vur meydach as dat kyrmyssgebot geboden ways / ys durch eyn Ersam Raidt der Stadt Nuyss eyndrechtlich ver- dragen ind ingegangen / dat nemantz van mynen heren vam raidt noch ouch eynnich burger der Stadt Nuyss in synem huyss heymlich zappen sall / dan offenbair / myt offenen dueren eynen krantz usshangende / ind neit meir don myt einen zaip vur eynen pennynck / ind neit zweyn off dryn zeppe van zwen off dryn penningen und weir hyrinnen van dussem dage in zo komende zyden / bruchlich befunden wurd / nemantz darvan uissgeschieden / der sall der Stadt Nuyss so ducke ind mannich maill sulxs geschege in seessduysent steyne / sunder gnaide / erfallen syn / ind die zo betzalen / darvan die burgemyst- ere zorzyt wesende dat derde deyll vur yre bruche haven sullen ind dat ander die stadt vurschreven

Johan Knoup wirdt die pfortz geboten

Item up ffrydach na Bonifatii des heiligen busschoffs ys eyndrechtlich durch eynen Ersamen Raidt der Stadt Nuyss verdragen ind gesloissen dat man Johan Knoup vayssbender up die port heysschen sall / umb dat hie mynen heren vame raidt ungehorsam gewest ys myt syner dochter die sich sold besien laissen off sy myt der krenckden der lasaryen\u0022lazarien\u0022 = Aussatz beladen weir off neit ind ouch die dochter myner heren dienner as sy durch yn gesoicht wairt affhendicht gemaicht

muntzmyster neit zo muntzen muntzmeister cassirt

Item up den selven dach ys ouch eyndrechtlich durch eynen Ersamen Raidt ver- tragen dat man dem muntzmyster den eydt ind muntz der Stadt Nuyss up- sagen sall so myn heren eyn zyt lanck neit gemuntz haven ind ouch nu neit muntzen ind der muntzmyster ouch nu mynen gnedigen heren van Cleve ind Guylich dem zo muntzen vereydt ind versworen yst

Item up ffridach na Agilolphi episcopi ys durch eyn Eirsam Raidt Gerhart Segensnyder / dat gaysthuys eyndrechtlich gegeven so er in der stadt arbeidt lange gewest yst truwelich gedient

Der mudder eidt

Item up satersdach na Jacobi apostoli hait Peter van Muelhem saick dreger vur gesichert ind na lyfflichen zo gode ind den heiligen gesworen eym yderman / umb syn gelt gehoirsam zo syn ind yne fruchten uprechtich in ind uiffzomessen / dem frempder as dem burger dem rychen as dem armen so dat mallich by dem synen moge blyven ind ouch geyne staelen der fruchten sullen dragen sonder alle arglist

Wyncken Loer

Item up dinxstach na Egidii des heiligen abt ys durch eyn Ersam Raidt eyn- drechtlich verdragen / dat man Wyncken Loer burger zo Nuyss / doll ind synre synne neit mechtich / der Tilman Albertz scheffen zo Nuyss versprochen ind gestoissen hadt / darumb hie in die Baene gesatzt wayss / dar uiss nymmen sall ind sittzen yn in dem torn an dem Veemart stainde / vur eynen dollen man gemaicht / ind man sall syne guedere upschryven laissen ind yem dar van noittroifft geven so lange de duyren / die vertzert / mach man dan besien wie hie vorder noittroifft verkregen mach angesien hie umb versprechong willen der heren ind ander ungemach dry maill gefencklich gesatzt ist etc.

Gobell Thewys

Item up den selven dach ys durch eyn Ersam Raidt eyndrechtlich ingegangen ind verdragen dat man Gobell Thewys dat poerterampt / der Nederportzen nymmen sall / ind eynen anderen gueden burger darmyt versorgen so hie Diederich Borchart dry schobben gersten buyssen synen wyssen affgenommen hait

Capittels wyne zo zappen

Item up fridach na Egidii des heiligen abtz ys durch eyn Ersam Raidt ver- dragen ind weder ingegangen dat dat capittell zo Sent Quirin bynnen Nuyss yre wyne na yre alden gewonheit bysher gebrucht sullen zappen dan dat capittell vurschreven sall nu vortan yre wyne jair vur jaire / buyssen yre diener wyne / als nu eyn jair off dry geschiet ys / off laissen foeren ind die ouch vertzappen

Gesworen montagh

Item up maendach na Exaltationis Sancte Crucis des morgens zo nuyn uren as die cruytz mysse in dem moenster Sent Quirin gehalden ways wart die stormkloick geluidt / die burgeren ind gemeynde sich up den Vrythoff zo vergaderen umb den gesworen maendach zo halden dar do scholtis scheffen ind raidt der Stadt Nuyss under der lynden by dem putz up dem Vrythoff erschienen und Johan Garthoff scholtis dat gericht na alder gewoenden beheghden und spraich so man van altz gewonlich ys

Gesworen maendach

des jairs eyns den gesworen maendach zo halden so ys hie nu der meynnonge den ytzont zo halden und maenden do Herman Reipgen as den elsten scheffen ind spraich so dit unserm gnedigen heren van Coelen syn hoicheit ind herlicheit in der Stadt Nuyss yre vryheit ind gerechticheit beruert / wie hie sich darinnen halden sall up dat nemantz darinnen des syns verkurtz werd as do bespraichen sich die scheffen ind raidt zosamen ind der elste scheffen / antworden den scholtis up syne ermanong der secretarius sall uch die alde roll / darinnen die dry achten beschreven stayn / vurlesen / ind die hoeren laissen / zome yrsten bys up die zweide acht do die yrste acht uisser der rollen gelesen wart spraich Peter ime Steynhuyss der gerichtzbaede up yder punte / dat wrogen ich / sulxs geschiet / maenden der scholtis Werner Strythoven den anderen scheffen darna neist stainde ind sprach west gemaint / wie sall ich mych wyder hyrinnen halden as sich der selve scheffen myt synen mytscheffen ind raide beraiden hait sprach hie zome scholtis / man sulde yem die ander acht vurlesen ind laissen hoeren die ouch durch den secretarius gelesen wairt und auch up yder punte spraich der baede / dat wroegen ich / dar na maenden hie Johan Kyver den derden scheffen ind vraigden wie hie sich wider hyrinnen halden sall / antwort der scheffen als hie sich myt scheffen ind raidt beraden had / man sulde yem die derde acht vurlesen ind hoeren laissen die ouch durch den secretarius gelesen wart bys zome ende ind der gerichtzbaede vurschreven spraich up yder punct / dat wrogen ich sulxs geschiet bereden sich die scheffen myt dem ersam Raidt ind do spraich Conraidt Kyver raitzman zorzyt burgemeister / her scholtis yr sult dem elsten scheffen ind dem elsten vame raide an yre hant tasten ind geloven alle die puncten in der wrogen roll gelesen ind gewroigt vast ind stede helppen zo halden dat unse gnedige her van Coelen an syne hoicheit ind herlicheit ind die Stadt Nuysse an yre vryheit ind gerechticheit unverkurtz blyve und scheffen ind raidt yre costen zo doyn als man van altz gewonlich ist so willen sy ouch myt umbryden as na myddage as gewonlich ys alle overbouwe ind ungewonliche bouwe zo besichtigen ind affzowroegen antworde der scholtis wie myr amptz ins eydtz halven geburdt zo doyn byn ich willich zo / ind geloiffden die vurgenannten punten an henden Hermans Riepgen vurschreven as dem elsten scheffen ind Johan Ebeltz as dem elste vam raide vast ind stede helppen zo halden / darna up dem selven dach na mytdage zo eyner uren luydt man wederumb die stormkloick die burgere ind gemeynden by eyn zo vergaderen up den Vrythoff dar do scholtis scheffen ind raidt ind der secretarius alle zo perde qwamen ind reden zome yrsten vur Johannes Custers huyss by Sent Niclais Capell / Herman Kremers huyss ind Drutgen Roggen huyssn up dem vrythoff by eyn liggende / dem capittell Sent Qurin in Nuysse zogehorende dar Johan Ebeltz vurschreven van wegen eyns Ersam Raidtz alle ungewonlige overbouwe / alle kisten / bencken / hallen van drynbort ind darboven / alle ferckenstelle ind pry- veyen off heymlicheiden ind myt allen infangen ind usshange overgriffen ys welche dry huyser vurschreven / ouch dat huyss dat Metzgen Otten bewonden up dem Martte ind dat huyss by dem yser an dem Vyssche Martte gelegen / dat

Griet Gurdelmechers bewonende ist / die Junfferen Sent Quirins moinsters verantworden / den wyn scheffen ind raidt na alder gewonden schenckden sprechende wie eyn Ersam Raidt hedde allezyt dieselve huysere myt yren kesten infange ind uishange also gebouwet gefunden ind die also dem heiligen marschalck Sent Quirin zo eire laissen stayn begerde darumb dat nach also halden ind sy darby na alder gewonden zo laissen antworden Johan Ebeltz vurschreven wis van altz gewest weir wullde man sy up dusse zyt darby laissen dem heiligen marschalck Sent Quirin zo eeren sulxs gescheit reden sy vort lanxs ront umb den Vrythoff / do durch die Kremerstraisse up dem martte lanxs dem kruxs / dar van dan achter der waige / under den Stypenborch durch op dem Vysschemartte na der Yaidenstege / durch die Brughstraisse / up der Overstraissen vur die Mynre Brodere ind do in gasse Drenckstege achter lanxs der stadtmuiyre bys an der Overportzen dar van dan durch die groisse portze / dar na geit na Junckher Rutger Velbrugen schure by der wyntmolen / vort durch die gaisse achter der Mynre Broderen ind do durch die Moiregayss up der Overstraisse ind do durch die Cloirengass an der Tollportzen lanxs die stadtmuiyre ind durch die Paiffengayss Achter Hoven in do weder umb durch die Clarengayss up der Overstraissen over dem martte lanxs die broithalle up der Nederstraissen / durch die Bayt- stoiffengaysse up Fleckenhoff vort na der Hantportzen achter by der stadtmuyre / die Gebrande Gayss up der Nederstraissen na der Neder- portzen ind vort lanxs die stadtmuyre an die Rynportze in der Ryn- straisse na der stadtmuyre in dem gange achter dem Cloister zo Marien- berge gaynde dar van dan inn Klockhammer vort inn Bongart durch die groysse portze ront umb vort na dem Cloister Marienbergh ind de scholen up dem Martte / ind do eyn yder heym gereden as scheffen ind raidt alsus myt dem scholtis durch die stadt umbreden / yrst an op den Vrythoff ind so vort an wie vurschreven hait Johan Ebeltz van des raidtz wegen up allen enden ind plaetzen durch die gantze Stadt Nuyss alle ungewonlige over- bouwe / kesten / bencken / hallen von dryn borden ind dar boven / alle noit- stelle /ferckensstelle / pryvaten off heymlicheiden ind myt allen infange ind uisshange overgriffen ys ind wyngarden myt den holtzeren stonnde ge- wroigt so dat der scheffen durch ermanong des scholtis up allen enden ind plaetzen / alle keste / bencke / oversprung / wyngarden myt den holtzeren noitstelle ins alle hallen van dryn bort / vur recht affgewyst hait up gnade des heren dan die ferckenstelle / heymlicheiden off pryveyen / hallen von vier bort ind daboven ouch die huysre schuren ind ander gebouwes up die drenckstege lanxs der stadtmuyre bys an der Overportzen myt der doeren achter Herbert Schofert huyss stayende / myt recht plaet aff erkant sunder gnade ind myt den huyseren ind gebouwes van der

stadtmuyre VII foysse zo ruymen ind zo wychen ouch die doere achter dem Cloister zo Marienbergh in dem gange staynde ouch myt allen gebouwes van borden huyseren stellen holthuseren wie dat gebouwet ys / by ind ront umb den saell ind bongart / vur recht allet plaet offerkant ys sunder gnade / unsers gnedichsten heren van Coelen hoicheit ind herlicheit zo behalden ouch die doeren ront umb den bongart stainde ind dar uss gaynde synt alle gewroicht ind zoerkant die zo zo machen ouch ys die groisse portze by der oberportzen by junckher Rutger Felbruggen schuyr / vur gemeynde gefroigt ind durch den scheffen erkant / dat die gemeynde ist ind sall allzyt offe stayn / dat eyn yder dardurch mach gayn stayn ind fairen as yem des van noeden ys und Johan Frederich sall myt synem garden da by der wyntmolen gelegen van der stadtmuyre sieven voyss ruymen dat man dar waill gayn ind stayn mach ind anders doyn wes van noeden sy ouch ys Gertgen van Oyckenkoven keller under der erden by yrem huyse stainde gelegen thussen der waegen ind dem kueffhuyss by dem Martte vur gemeynde gewroegt ind ouch durch dem scheffen vur gemeynde erkant ys ind Gertgen ind yre erven sullen schuldich syn van sich zo geven brieve ind siegele * / dar myt zo bewysen / dat die stadt Nuysse allwege as ir des van noeden ind gelegen ys / eyn stoeve ader eyn ander gebouwe up dem keller vur yren huyse setzen moegen sunder eynich wedersagen ouch synt die portzen/putzen in der Brugh- straisse gegen Camp / hynder die Mynre Broderen / hynder hoeven under Fleckenhuyss / myt dem wasserpoyll aldair / up Fynckenhoff / up dem over dar die Canonichen woenen ind der putz gegen Juncker Nuwen- kyrchens hoff ind der Stypenborch up dem Vysschemart / alle vur ge- gemeynden gewroicht ind durch die scheffen gewiesen Und hallen van zwen bort synt neit gewroicht noch afferkant / yeder bort II albus

* Wilche brive Peter Fuetgen ind syn huysfrouwe van sich gegeven haint ind up der raitzkamer in dem schap liggent

Wer vur eynen XXIIII gekoren sall werden

Item up donrestach na Remigii des heiligen buschoffs ys durch eyn Ersam Raidt eyndrechtlich ingegangen ind verdragen dat man nemantz zo eynem XXIIII in eynichen kyrspell durch die gemeynden van Nuyss gekoren noch an- genommen sall werden derselve sy dan gelich ind meyssich eynen Ersam Raidt na inhalt eynes privilegien durch seliger gedechtenysse buschoff Philippus der kyrchen zu Coelen ind so Johan Breve in dem Tollporter Kyrspell vur eynen XXIIII gekoren ys / dem raidt neit gelich ind geyn eekynt ys sall dat kyrspell eynen anderen in syne stadt settzen ind kiesen etc.

Henrich Bartscherer

Item up dinxstach na Gereonis ys eyndrechtlich durch eyn Ersam Raidt verdragen ind ingegangen dat man Henrich Bartscherrer in des Potgeters huyss gegen den Claren wonende up die portz heysschen sall / umb dat hie in synem huyss eyn vrauw die gestoelen hait / untfrempt hait

Thomas Hallenstender

Item up ffridach na Huperti episcopi hait eyn Ersam Raidt Thomas Hallen- stender als cleger eyns ind Jacob Hallenstender Peter Westphelinck ind Johan Duyfels anderdeils beclaigder up dat raythuyss beschieden ind yn vurgehalden durch den burgemeister Rembolt Kreytfysch van eynem Ersams Raitz wegen wie hie die saiche van wegen eyns Ersams Raidtz as burgemeister in stat Conraidtz Kyvers zorzyt burgemeister / die saiche thussen yn beiden parthien vur dem hoegen gericht zo Nuyss umb etz- liche schelt war die swevende / na goder alder gewonheit boven mynschen gedachtenysse bys her gebrucht / dat burgere ind burgerkyndere an- treffende weir / an eyn Ersam Raidt die zo verhoren ind zo straiffen affge- heysschen ind myt erleuffenysse des gerichtz an sich genommen / het / ind so durch undersuechonge der saichen / hed eyn Ersam Raidt / erfonden under allem na dem maill dat Jacob Peter ind Johan vurschreven genannten Thomas vur dem beckerampt unbillich van yren eygen gemoule ind neit van hoeren sagen vur eynen offenbair deyff beclaigt haven ind sulxs bewysen wolden / etc. ind sulxs neit gedain haven ind yem syn goede geruchte dardurch ge- nommen haven / hait eyn Ersam Raidt erkant / dat Jacob Peter ind Johan vurschreven gedachten Thomas umb goitz willen vergyffenys bydden sullen / da vur eyn Ersam Raidt ind dat ampt / dat sy die worde up Thomas unbillich gesaicht hain ind yn anders nyrgens vur en halden dan vur eynen vrommen gesellen ind Thomas syne gerichtliche costen darumb gedain verrichten ind eynen Ersam Raidt die boysse und bruche as yn dat die burgemeistere kort sullen doyn affdragen sulchs gehoirt hait Jacob Peter ind Johan / gnanten Thomas vergyffenys der worden halven in gegenwordicheit eyns Ersams Raidtz ind des beckersamptz umb gotz willen gebeden dat Thomas yn also umb getz willen vertziegen hait beheltenysse yem syne gerichtliche costen

Coen Hallenstender

Item up die selve zyt hait gnante burgemeister Rembolt Kreitfysch in stadt Conraidt Kyver burgemeister zorzyt van eyn Ersam Raidt vurgegeven wie die selve vurschreven scheltworden / durch Coen Hallenstender ind Thomas vurgenannt eynen oirsprunck hetten ind yrent halven in gebrech die vurschreven Jacob Peter ind Johan gekomen weren also dat Coen umbtrynt V oder VI wechen up die zyt as Goert Kremer die schynck up der waegen gegeven het / im kortz verleden in bewesen goder burger / lude des gerichtzboichs na etzlicher konden / gesprochen hed / dat Thomas weir eyn deyff ind eyn halssdeyff ind sulxs so duck up yen ind gegen yen sagen wuld als yen geluyssden / und darumb wuld eyn Ersam Raidt haven dat Thomas sulxs verantworden sall / off da? Coen Thomas sulxs overwysen suld / off eynen man darvan machen der sulxs plichtlich weir den sy darumb straiffen muchten / den sy wyssen willen ind dat die parthie sulxs zome neisten vur eynen Ersamen Raidt verantwworden

Henrich Bartscherre

Item up den selven dach durch bede der frunde / naberen ind burgeren / hait eyn Ersam Raidt / Henrich Bartscherrer up der Overstraisse in des Pot- geters huyss gegen den Claren wonende / der portzen erlaissen / dar hie up- syttzende ind durch den doyrwechter / geheysschen ways so dat hie eyn vrauwe die gestoillen haid / die man myt recht beslain sold / untfrempt haid / ind dede hie der off andere gelichen saichen meir sall yem dese saiche asdan neit vergeven syn / dan darumb groifflich gestraifft werden

Convent Sebastianus

Item up Godestach na Martini episcopi ys durch eyn Ersam Raidt eyndrecht lich verdragen / dat man dem pater ind convent zo sent Sebastianus in Nuyss verbieden sall / dat sy den bouw den sy ytzont up der hoif- statt / dar eyn schuyr opsteit / die sy van Johan van Euskyrchen burger zo Nuyss ind Lysgen Frantzen / in der Gebrander Gayssen by yren convent gelegen neit upbouwen noch vollenbrengen / dan leggen layssen / ind die hoffstat myt der schuyren wedderumb an die werentliche hant stellen / so sy wyssen dat sy geyn werentliche guedere / die in die geystliche hant zo brengen / gelden sullen und ouch ys gegen die privilegien ind fryhieden der Stadt Nuyss / dat die geystlicheit geyn werentliche guedere hyr gelden sullen etc. und Herman Buepgen ind Werner Strythoven scheffen / die dese updraicht besiegelt haint / sullen den brieff weder zo yren henden krygen / die siegell affsnyden ind den van unwerde machen / ind sulxs eynen Ersam Raidt vurbrengen ind sien laissen angesien eyn yder scheffen gesworen hait die stadt by yren privilegien ind fryheiden zo halden ind dar gegen neit zo doyn

Nederportz

Item op den heiligen curstavend hait eyn ersam raidt Gobell Tewys portener an der Nederportzen eyndrechtlich umb etzliche oirsachen / dat poerterampt genommen ind yn affgesatzt / ind in syn stat Goert Kalckmudder holtryter genommen / dat selve ampt truwelich zo bedienen in synem affwesen

Hantportz

Item up den selven curstavend ys Jaixken Opperknecht poertener an der hant- portzen eyndrechtlich durch eynen Ersam Raidt / van synem poerterampt ouch umb etzliche oirsachen affgesatzt ind yn dat genommen ind Johan Rommerskyrchen tymmermman in syn stat gesatzt dat ouch truwelich zo bedienen in synem affwesen

Johan Witzell

Item up den selven avent ys durch eyn Ersam Raidt eyndrechtlich verdragen dat beide burgemeisteren sullen Johan Witzell scheffen ind provisoir des nuwen gayst- huyss eyn zyt settzen darinnen hie syne rechenschaff van den selven nuwen- gaysthuyss machen ind doyn sall ind dat ghiene darvan betuchenis/beternis dat hie schuldich ys ind geschege dan sulxs neit asdan wilt sich eyn Ersam Raidt wyder darup bedencken

Gobell Thewys

Item up dinxstach na der heiliger dry koninck dach ys Gobell Thewys durch bede der sementlicher naberen wider durch eyn Ersam Raidt vur eynen poertener der Nederportzen eyn jair lanck angenommen sich nu also zo regeren / dat man geyn clage neit meir van yem hoer

Dysse herna geschreven synt ime jaire XXXII vurschreven under den burgemeisteren Johan Moenhem zome Crantz scheffen ind Conraidt Kyver raitzman burgere geworden

Johan Anghenend van Boychem myt dem wynschroder ampt Reynhart Rutgers van Zoyns Frederich van Solingen eyn spoyrmecher Clays van Ganggelt Johan Tymmerman van Nuyss der jong Arnt Sluyter van Neyrst myt dem kayrbender ampt Merten Kyrsmych van Carst myt dem schomecher ampt Herman van Wylich myt dem schomecher amt Wymmer Straitman van Essen hallenstender Thomas Tilmans Schomechers soen van Nuyss Conraidt Nelys van Nuyss myt dem kremer ampt Hermann Armin Blottzen soen hallenstender Welter vame Boysch wullenwefer Henrich Thiss van Zoyns hallenstender Werner Vysschell van Nuyss Herman Kuyrberch van Buyrich hallenstender

Wilhelm Hammecher van Nuyss Johan Nelys van Nuyss myt dem kremer ampt Franck van den Hoegenholt hallenstender Wilhelm Stockman van Nuyss myt dem schomecher ampt Goedert Byrckmans van Oysteraidt hallenstender Johan then Dorn van Oysteraidt wullenwefer Swybert van Keyserswerd halffman im Hoeve in der Rynstraissen Meus Rosenbuem van Alderaidt myt dem bruwer ampt Sebastianus Raidmecher myt dem ampt Diederich Weyckert van Crefelt Peter Aloiffs Scholeppers soen van Nuyss Wilhelm van Guylich wefer Henrich van Carst Johan van Hoiffsteden doichscherrer Johan Hyntzen Goert soen bruwer Peter van Eller wullenwefer

Anno XV C XXXIII Peter Gruntzgen Rembolt Kreytfysch burgermeisteren

Die wyne ind slussell durch die rentmyster zo untfangen

Item up donrestach na Blasius episcopus / ys durch eyn Ersam Raidt eyndrechtlich verdragen ind ingegangen so wat wyne die up den sondach na Conversionis Pauli apostoli vur der vesper zo Nuyss an dem kranen komen / die sullen den alden rentmysteren zostendich syn und die wyne die up den selven sondaich na der vesper komen an dem kranen komen die sullen den nuwen rentmysteren zostendich syn als dat van alders her gewonlich ys und den dach neist na Blasi episcopi folgende sullen die alde rentmystere die nuwe rentmysteren yre sluyssel van dem gemaill der moelen overleveren ind hantreichen